A Sociedade Deportiva Compostela anunciou a incorporación de José Luis Míguez Iglesias ‘Luisito’ como novo adestrador do equipo ata o final da tempada. O técnico, natural de Teo (1966), asume o reto de mellorar o rendemento do conxunto branquiazul e afastalo das últimas posicións da clasificación.
Luisito conta cunha ampla experiencia no fútbol galego, tanto como xogador como adestrador. O novo técnico comezou a súa traxectoria deportiva na canteira do Compos, onde xogou entre os 12 e os 22 anos. Xa nos bancos, dirixiu equipos en Terceira e Segunda División B, pasando polo Cidade de Santiago, Racing Club de Ferrol, CD Ourense, Pontevedra CF (en dúas etapas), Deportivo Fabril e Arousa, club no que traballou ata agora.
Despois de asinar o seu contrato, Luisito será presentado mañá ante os medios de comunicación e o mércores dirixirá o seu primeiro adestramento co equipo. A súa estrea como adestrador do Compos producirase no partido deste domingo contra o Guijuelo.
