Mañá, sábado, 12 de outubro, o Concello de Ames celebrará a primeira edición do Cros Concello de Ames, que servirá tamén como Campionato Galego de Campo a Través Absoluto por Remudas Mixtos. A competición desenvolverase en Aldea Nova, nas inmediacións das pistas municipais de tenis, e contará coa participación de 102 rapaces e rapazas en categorías escolares e 48 atletas que competirán no campionato galego.
O evento, organizado co apoio técnico da Federación Galega de Atletismo, contará con 12 equipos de remudas mixtos, onde cada equipo estará composto por dúas mulleres e dous homes. A participación no campionato galego incrementouse respecto á edición anterior, con catro equipos máis este ano.
A xornada comezará ás 11.00 horas co relevo mixto, que cubrirá aproximadamente 6.000 metros (4×1.500 metros). As diferentes categorías, desde sub 10 ata sub 18, competirán en distancias que varían entre 1.000 e 3.000 metros, finalizando as probas ás 13.35 horas. A entrega de trofeos está prevista para as 13.50 horas.
Os trofeos serán entregados aos tres primeiros clasificados de cada categoría, e haberá un premio adicional para o primeiro corredor empadroado en Ames. Os interesados poden consultar o regulamento completo e os horarios de saída na páxina web da Federación Galega de Atletismo.
