Unha investigación da USC profunda na figura da profesora estadounidense Georgiana Goddard King, considerada a primeira “peregrina erudita” por visitar Santiago en 1915 coincidindo co Ano Santo nunha experiencia que plasmou cinco anos despois nun libro sobre a Ruta Xacobea que serviu para difundir o Camiño nos Estados Unidos. O traballo desenvolvido entre 2021 e 2024 baixo a coordinación dos profesores Miguel Taín Guzmán e Patricia Fra acaba de ser publicado no libro ‘Georgiana Goddard King e The Way of Saint James (1920). A primeira peregrinación erudita polo Camiño de Santiago’, editado por Akal.
Ao longo de distintos capítulos, varios expertos analizan a figura desta profesora de Historia da arte desde puntos de vista, como a súa achega aos estudos hispanistas norteamericanos a través de ‘The Way of Saint James’ e o seu contraste, coa perspectiva feminista, ás visións doutros autores contemporáneos. A súa formación académica e a súa experiencia do Camiño, así como os preparativos da viaxe ou a elaboración do libro no que envorcou o vivido e a análise do patrimonio que Goddard King coñeceu na súa ruta desde os Pireneos a Santiago que prolongou ata o Atlántico son outros dos temas que recolle a obra académica sobre a estadounidense.
Da súa estadía en Santiago, Goddard describe as festas do Apóstolo, nas que asistiu á misa na que viviu o desfile do arcebispo e o delegado rexio que se mantén na tradición na actualidade. A investigación sobre a profesora hispanista tamén aborda a súa análise da Catedral compostelá, á que se aproxima desde a consulta do Códice Calixtino baixo a guía do pai Fidel Fita e o arquiveiro Antonio López Ferreiro. A autora está considerada a primeira persoa que investigou e analizou o estado das rutas a pé do Camiño Francés, á vez que se dedicou a recoller os milagres, lendas e tradicións vinculadas ás peregrinacións.
