O Ateneo de Santiago acollerá este luns, 19:30 horas, a presentación do disco Yaya Kuntur (Padre Cóndor). Himnos en latín y quechua (siglos XVI-XIX) de Manuel Vilas & Ars Atlántica. Durante o acto, que terá lugar na rúa do Vilar, 19, o recoñecido arpista Manuel Vilas presentará unha arpa histórica do século XVIII, obra do luthier Javier Reyes de León, reproducida na portada do disco.
Vilas compartirá co público o proceso de creación deste proxecto, que recompila himnos católicos en latín e quechua do Virreinato do Perú, ademais doutras pezas de música peruana como o yaraví. O disco conta coa colaboración de Magali Revollar e o tenor Diego Blázquez. A obra pretende dar a coñecer un repertorio histórico pouco difundido e destacar a relevancia da arpa nesta música.
O arpista compostelán, especialista en arpas antigas, é coñecido pola súa contribución á recuperación de repertorios históricos en festivais de Europa, América e Asia, consolidándose como unha figura clave na música barroca en España e Latinoamérica.
