No marco das celebracións da Noite Galega das Persoas Investigadoras 2024 (G-Night), a Real Academia Galega de Ciencias (RAGC), en colaboración coa Universidad Intercontinental de la Empresa (UIE), organiza mañá venres unha charla baixo o título «O metro calculado por un galego do século XIX», en homenaxe a José Rodríguez González, quen foi nomeado Científico Galego do Ano pola RAGC. A conferencia, que se celebrará ás 19:00 horas na sala de conferencias de Afundación en Santiago de Compostela, estará a cargo do matemático e investigador da Universidade da Coruña, Xabier Pérez Couto.
José Rodríguez González, nado en Lalín en 1770 e falecido en Santiago en 1824, é coñecido como “O Matemático de Bermés”, sendo unha das figuras máis destacadas da ciencia europea do seu tempo. As súas contribucións abranguen campos como as matemáticas, a xeometría, a astronomía, a xeografía e a mineraloxía. A charla ten como obxectivo achegar a súa figura ao conxunto da sociedade, destacando o impacto das súas investigacións.
Este evento forma parte dunha serie de actividades que a RAGC está a desenvolver para conmemorar a traxectoria de Rodríguez González, cunha especial atención na súa relevancia dentro da historia da ciencia galega e europea.
