O V Concurso de Microrrelatos Gadis xa ten gañadores. Tres relatos, centrados na temática “os inicios”, foron seleccionados entre 2.016 textos enviados de todo o país, confirmando o éxito desta iniciativa da cadea galega de supermercados. O obxectivo deste certame é fomentar a cultura, dar visibilidade ao talento literario de persoas anónimas e incentivar a escritura entre todos os públicos, con participantes que van desde os 15 ata os 77 anos.
O certame busca visibilizar a creatividade de novos e maiores a través de historias que espertan emocións e captan a atención en poucas liñas. A habilidade para contar un relato atractivo en formato breve destaca unha vez máis pola diversidade e orixinalidade das propostas.
Relatos premiados O primeiro premio foi para Natalia Portas, de Pontevedra, co relato titulado ‘Metamorfose’, escrito en galego. O relato narra a transformación dunha eiruga en bolboreta: “A min mesma: Seino, abofé que o sei, aínda que dubido de cando en vez pola miña natureza pouco xeitosa… Benvida fermosa bolboreta á vida curta das ás e liberdade. Con morriña. A Eiruga”.
O segundo premio foi para Jesús Suárez, da Coruña, polo seu relato fantástico titulado ‘Marte’, que culmina cun xiro inesperado: “En lo alto, había un cartel luminoso que en muchos idiomas diferentes decía: ‘Bienvenido a Marte'”.
O terceiro galardón foi para Antonio Sánchez, de Salamanca, co relato ‘El latido cósmico’, no que describe a creación do universo con frases curtas e poéticas: “En la vastedad del vacío, un destello de luz. Un latido, un susurro, el inicio de todo…”.
Os premios para os gañadores inclúen un patinete eléctrico Xiaomi, unha cámara instantánea Polaroid e un eBook.
Os tres relatos premiados, xunto cos 95 finalistas, serán reunidos nunha edición especial impresa, que se poderá descargar en formato pdf desde a web de Gadis. Distribuiranse 12.000 exemplares nos supermercados Gadis a finais de outubro, coa intención de promover a lectura entre os clientes.
O concurso forma parte do compromiso de Gadis coa promoción cultural, incluída na súa Responsabilidade Social Corporativa, coa que xa ten publicado máis de 60.000 libros de microrrelatos desde o inicio do certame.
