A Facultade de Filoloxía da Universidade de Santiago de Compostela cumpre 50 anos e celebrará esta data con diversas actividades ao longo dos vindeiros meses. Durante a presentación do programa conmemorativo, o reitor Antonio López destacou que a facultade naceu “na eclosión de facultades dos anos 70” e lembrou a evolución da USC, que pasou de ter cinco facultades en 1922 a 25 facultades na actualidade.
No acto de presentación, o decano da Facultade de Filoloxía, Elias Feijo, subliñou a importancia de preservar a memoria histórica para construír o futuro do centro. Destacou que os estudos de Filoloxía teñen unha longa tradición en Santiago, referíndose á antiga Universidade Literaria, e que a facultade actual, fundada en 1975, debe seguir promovendo a docencia, investigación e a transferencia de coñecemento.
A vicedecana de Cultura, Elsa González, adiantou que o programa de conmemoración incluirá a difusión de vídeos sobre o traballo do centro, a publicación dun libro conmemorativo e unha serie de conferencias mensuais a cargo de ex decanos e decanas. O ciclo de conferencias comezará o 23 de setembro con Ramón Lorenzo. Tamén haberá encontros con antigos alumnos que falarán das saídas profesionais para os titulados en Filoloxía.
Entre as actividades programadas destacan dúas exposicións. A primeira, inaugurada este xoves, é a mostra fotográfica A Dança da Lua, do fotógrafo Sérgio Jacques, centrada na visita do escritor Urbano Tavares Rodrigues a Santiago en 1948. A segunda exposición, titulada ‘¿Encontraría a Julio Cortázar?… cuarenta años después‘, será inaugurada o 26 de setembro na Facultade de Filoloxía.
O acto de presentación contou coa asistencia de representantes académicos, membros da comisión de honra e colaboradores do programa, así como antigos estudantes da facultade, entre os que destacou a presenza da cantante Uxía Senlle.
