A Xunta e o Musée du Quai Branly-Jacques Chirac (Francia) asinaron un acordo para exhibir en outubro na Cidade da Cultura unha das maiores exposicións internacionais sobre tatuaxe. Co título ‘Tattoo. Arte baixo a pel’, a mostra explora a historia e simboloxía cultural, social, estética e relixiosa desta práctica e tenta explicar as razóns de que as tatuaxes estean presentes en todas as épocas históricas e zonas xeográficas do mundo.
Segundo informou a Xunta, a proposta, producida polo que é un dos museos franceses máis relevantes, inaugurarase no Museo Gaiás o 24 de outubro e permanecerá aberta ata o 20 de abril. Tras ser exhibida en Francia, Canadá, Estados Unidos, Taiwan e Rusia, chega a Galicia coa colaboración da Fundación ‘La Caixa’, convertida nunha das exposicións sobre tatuaxe máis completas e atractivas desenvolvidas ata o momento, unha proposta imprescindible para comprender a pulsión que leva ao ser humano a marcar con tinta o seu corpo.
