Este xoves inaugurouse no Claustro Alto do Colexio de Fonseca a exposición ‘Miradas. Mulleres na arte‘, unha colección de 41 obras da pintora e profesora Elsa Martínez, que estará aberta ao público ata o 31 de outubro. A mostra presenta retratos de mulleres artistas, desde pintoras e escultoras ata escritoras e actrices, que desenvolveron as súas creacións entre os séculos XVI e XX.
A vicerreitora de Estudantes e Cultura, Pilar Murias, describiu a exposición como “unha proposta moi orixinal en canto a técnica e moi interesante en canto a temática”, destacando a relevancia de visibilizar o papel das mulleres no mundo da arte.
A través das súas obras, Elsa Martínez busca reivindicar o legado de mulleres artistas esquecidas e aquelas que loitaron por destacar nun mundo artístico dominado polos homes. Martínez explica que a súa intención foi “captar a mirada das artistas” e manter a súa esencia no tempo, subliñando a importancia da presenza feminina na cultura.
A exposición inclúe nomes como os das galegas Maruja Mallo, Rosalía de Castro e Emilia Pardo Bazán, xunto a figuras internacionais como Frida Kahlo, Sofonisba Anguissola e Virginia Woolf. As obras foron realizadas con técnicas variadas, incluíndo acrílico, collage, lapis, acuarela e un uso innovador de plastilina, co que a artista busca garantir a durabilidade das creacións.
A mostra pode visitarse de luns a venres, de 11:00 a 14:00 e de 17:00 a 20:30, e o acceso é libre e gratuíto.
