Durante o mes de setembro, a capital galega converterase nun dos escenarios da rodaxe de Antes de Nós, o primeiro biopic sobre Alfonso Rodríguez Castelao, dirixido por Ángeles Huerta, coñecida polos seus traballos en O corpo aberto (2022) e Esquece Monelos (2016). A longametraxe, que ten prevista a súa estrea en salas cinematográficas en 2025, busca ofrecer unha visión íntima e profunda sobre a vida e as emocións do intelectual galeguista.
As gravacións comezaron este luns no IES Rosalía de Castro, e continuarán na capital galega a vindeira semana. O luns 9 de setembro, o equipo de rodaxe estará na praza de Santo Agostiño, mentres que o xoves 12 as cámaras desprazaranse ao Pazo de Raxoi. Outras localizacións relevantes na vida de Castelao, como Rianxo, Pontevedra, así como Muros, Fisterra, Silleda e Negreira, tamén serán escenario desta produción.
No papel de Castelao, o actor Xoán Fórneas interpretará ao protagonista, acompañado dun elenco destacado, que inclúe a Cris Iglesias como Virxinia Pereira, Nancho Novo como Sobral, o canteiro, e outros actores como Xoel Fernández, Miquel Insua, Sergio Zearreta, Isabel Vallejo e Adrián Ríos.
Antes de Nós busca afondar en episodios cruciais da vida de Castelao, como o seu traballo como médico durante a gripe de 1918 en Rianxo e a súa viaxe a Bretaña en 1929, tras a perda do seu fillo Chuchiño. A cinta explora non só a figura de Castelao antes de ser o referente que hoxe coñecemos, senón tamén o contexto histórico de Galicia antes da Xeración Nós, ofrecendo unha mirada profunda sobre a relación entre Castelao e a súa muller Virxinia.
