O auditorio do Museo do Pobo Galego acolleu este mércores a homenaxe colectiva a Dorothé Schubarth, musicóloga suíza responsable dunha das maiores recompilacións de melodías populares galegas. A xornada festiva estenderase todo o día da man do propio museo, o Consello da Cultura Galega e o Instituto da Lingua Galega da Universidade de Santiago.
“Dorothé Schubarth foi unha muller que se entregou á cultura galega, á que se dedicou en profundidade, e que nos deixou un legado impagable”, destacou a presidenta do Consello, Rosario Álvarez. Protagonista da homenaxe foi a artista Felisa Segade, que interpretou música tradicional cunha selección de músicas e fotografías do APOI do Museo do Pobo Galego recollidas por Dorothé.
A continuación, celebrouse unha sesión titulada ‘Notas biográficas: Lembranza de Dora e do seu traballo en Galicia’, na que interveu Antón Santamarina, co que Schubart recompilou as melodías, coautor do Cancioneiro Popular Galego e que destacou “a xenerosidade de Schubarth coa cultura galega“. “A súa chegada a Galicia foi providencial porque por aquel entón había aínda centos de informantes e non tiñamos suficientes musicólogos que lles prestasen a atención necesaria”, apuntou.
As xornadas de homenaxe concluirán este xoves cunha sesión vermú cunha selección de pezas sobre material recolleito por Dorothé interpretadas polo dúo Caamaño e Ameixeiras. O programa continuará pola tarde, a partir das 17.00 horas cunha mesa redonda titulada ‘O traballo de Dora alén do cancioneiro’ na que participarán Lucía Cedrón, Carme Campo, Alejandro Gándara e Antonio Reigosa.
Seguidamente haberá un intermedio audiovisual, cunha selección de imaxes e voces, acompañados da música en directo de Cástor e Félix Castro. A xornada de homenaxe concluirá cun concerto na Igrexa de Bonaval, no que o cuarteto Alicerce, Alberto Aneiros e Marcos Mato interpretarán ‘Transformacións’, unha peza clásica composta por Dorothé.
