Santiago converteuse en sede do Encontro Ibérico de Orzamentos Participativos, un foro internacional que reúne representantes de distintos municipios do Estado español e de Portugal co obxectivo de compartir experiencias sobre democracia participativa e impulsar modelos de xestión nos que a cidadanía teña un papel activo nas decisións públicas.
A concelleira de Dereitos e Servizos Sociais, Promoción Económica e Xuventude, María Rozas, expresou o seu agradecemento pola elección de Compostela como sede do encontro, asegurando que representa unha oportunidade para dar a coñecer o traballo que se está a facer na cidade: “permitiranos compartir a nosa experiencia sobre os procesos dos orzamentos participativos, e aprender tamén do que están a facer noutros municipios de todo o Estado e de Portugal”.
Rozas salientou que os orzamentos participativos foron recuperados neste mandato na área de Xuventude, un ámbito no que o Concello está a observar unha crecente implicación do tecido mozo: “en cada edición vimos logrando unha maior implicación e un maior número tanto de propostas como de votos”. Para a tenenta de alcaldesa, este modelo serve para “situar á cidadanía no centro das decisións públicas” e, en particular, para conectar co sector xuvenil, “que moitas veces se sente afastado da institución municipal”.
O Encontro Ibérico de Orzamentos Participativos naceu en 2012 coa intención de construír espazos de cooperación duradeiros entre territorios que apostan pola participación directa da cidadanía na definición do gasto público. Desde aquela primeira edición, celebrada en Odemira (Portugal), o foro ten pasado por outras localidades como Mollina (Málaga), Ponta Delgada (Azores), A Coruña, Cascais, Vic e Torres Vedras (Lisboa), converténdose nun referente internacional para administracións locais comprometidas cun modelo de gobernanza máis horizontal.
A edición compostelá do encontro ofrecerá mesas de debate, presentacións de boas prácticas e obradoiros específicos sobre ferramentas de participación e estratexias para fortalecer o compromiso cidadán coa vida pública, poñendo especial atención nos sectores que tradicionalmente teñen menos presenza nestes procesos, como a mocidade ou as persoas migrantes.
O evento consolida a aposta de Santiago por modelos innovadores de participación e amosa a vontade do goberno local de seguir fortalecendo a democracia municipal, integrando as voces da cidadanía desde a base e promovendo espazos de encontro entre territorios que avanzan nunha mesma dirección.
