Unha trintena de asociacións culturais galegas daranse cita o vindeiro sábado, 1 de xuño, no Museo do Pobo Galego para realizar un encontro de traballo colectivo.
O director do Museo do Pobo Galego, Manuel Vilar detallou que este encontro busca que as diferentes asociacións “coñézanse e compartan experiencias”.
A cita, baixo o título ‘O futuro dun legado. Encontro do asociacionismo cultural galego a cen anos do SEG’, servirá de colofón ao programa de actos con motivo dos 100 anos de creación do Seminario de Estudos Galegos.
Con ela, o Museo, unha das institucións herdeiras daquela entidade, pretende remarcar o traballo das asociacións que, de maneiras diversas desde diferentes puntos, continúan o labor iniciado polo SEG.
No encontro participarán preto de 30 asociacións das catro provincias galegas que traballan en investigación e divulgación de diferentes ámbitos do patrimonio galego, como son: científico, cultural, histórico, territorio e patrimonio inmaterial, entre outros.
Esta xornada será de intercambio e reflexión colectiva, para profundar nas posibles solucións aos desafíos que xorden na xestión dos proxectos, para analizar e fomentar as relacións entre o tecido asociativo, veciñanza e patrimonio e para celebrar conxuntamente o traballo que realizan desde o tecido asociativo.
Así mesmo, a cita busca abrir vías de intervención e de participación directa da sociedade nun Museo do Pobo Galego que é froito do traballo asociativo.
