Curtocircuíto reforzará nesta edición a súa liña dedicada á creación audiovisual en directo cunha programación de concertos e sesións que situará a relación entre son, imaxe, tecnoloxía e performance como eixo central. O artista xaponés Ryoichi Kurokawa encabezará o cartel coa presentación de nD, nun programa no que tamén participarán Marta Verde e José Venditti, Los Sara Fontan e Tamara de la Fuente, Arvin Dola e Irene Gaumé, e Artur M Puga e Sevi Iko Dømochevsky.
A proposta audiovisual do festival concíbese como unha extensión da súa programación cinematográfica máis experimental e busca establecer vínculos entre a pantalla, a experiencia inmersiva e a creación escénica. Nesta edición, ademais, terá un peso destacado a colaboración entre artistas galegos e creadores procedentes doutros territorios, nunha programación construída arredor do intercambio de linguaxes e da creación compartida.
Un dos nomes principais será o de Ryoichi Kurokawa, figura vinculada á escena audiovisual internacional, que regresará a Curtocircuíto para presentar no Auditorio de Galicia o proxecto ‘nD’. Trátase dunha peza que o artista desenvolve desde hai dúas décadas e que xa foi exhibida en institucións e festivais como Tate Modern, Ars Electronica ou MUTEK. A obra propón unha experiencia inmersiva na que a imaxe e o son avanzan de maneira conxunta, explorando as fronteiras entre a abstracción e a representación e a relación entre o visual e o auditivo.
A programación tamén incluirá unha estrea mundial na praza de Praterías. A creadora pontevedresa Marta Verde e o compositor e artista sonoro estremeño José Venditti presentarán ‘GAMMA’, unha performance inspirada nas investigacións científicas sobre a actividade cerebral nos momentos previos á morte. A peza combina son, luz e imaxe para construír unha experiencia sensorial arredor dos estados de consciencia e dos límites da percepción humana. Este novo traballo dá continuidade á colaboración que ambos os artistas manteñen desde hai arredor dunha década, centrada na relación entre tecnoloxía, espiritualidade e fenómenos difíciles de explicar desde unha lectura racional convencional.
Outro dos espazos escollidos será o aparcadoiro do Auditorio de Galicia, onde Curtocircuíto acollerá a estrea de Consuelo no parking: un concerto iluminado con coches. A proposta foi concibida especificamente para o festival por Los Sara Fontan e pola fotógrafa compostelá Tamara de la Fuente. A creación parte da cultura do parkineo e da música experimental para transformar un lugar de tránsito nun escenario de encontro. A peza incorpora violíns procesados, ritmos irregulares, luces halóxenas e referencias ao imaxinario automobilístico, nun traballo que combina celebración colectiva, ironía e exploración sonora.
Na carballeira de Santa Susana, o compositor e multiinstrumentista andaluz Arvin Dola e a artista visual estadounidense Irene Gaumé presentarán ‘O Ghost’, adaptación escénica do álbum debut de Dola. A proposta mestura sintetizadores, voz e violonchelo cun dispositivo visual desenvolvido a partir de fotografía dixital, técnicas de focus stacking e intelixencia artificial. O resultado sitúase entre o analóxico e o dixital e aborda cuestións como a memoria, a identidade fragmentada e a aparición de formas espectrais nun espazo en transformación.
A praza da Quintana será o escenario da colaboración entre o galego Artur M Puga e o andaluz Sevi Iko Dømochevsky, creada tamén de maneira específica para Curtocircuíto. Baixo o título Maintaining Investor Confidence Through Accelerated Decay, a peza moverase entre a cultura club, o cinema experimental e a ficción especulativa. A proposta despregará un ecosistema audiovisual aberto á mutación, no que a tecnoloxía, a materia e a percepción se presentan como elementos en cambio constante.
A sección completarase coa programación nocturna na sala Fantástica, que acollerá dúas sesións de dj. O venres será a quenda de Frau Troffea, artista compostelá integrante do colectivo Gas Clube. O seu set partirá da idea de dualidade e percorrerá contrastes entre luz e escuridade, tensión e descanso, impulso e contemplación, con ritmos quebrados e estruturas cambiantes.
O sábado, a noite estará protagonizada por PV3000, proxecto do músico e artista visual vigués Emilio Horyaans. A súa sesión transitará por territorios próximos ao techno, o electro, a bass music e a IDM, combinando ritmos de club, texturas abstractas e atmosferas melancólicas nunha proposta conectada coa dimensión máis experimental do festival.
