HomeCULTURARomaría popular, teatro, talleres ou música, entre as actividades da Festa do...

Romaría popular, teatro, talleres ou música, entre as actividades da Festa do Banquete de Conxo

A cineata Jaione Camborda porá o peche a este evento, que se celebrará os días 24, 25 e 26 de maio

Publicado o

Por Europa Press

O Concello de Santiago presentou este martes o programa definitivo da Festa do Banquete de Conxo, que se celebrará os días 24, 25 e 26 de maio e que contará coa tradicional romaría popular, desfiles teatralizados, múltiples talleres, música en directo, fotografía ou actividades deportivas e de natureza, entre outras. A alcaldesa da capital galega, Goretti Sanmartín, e a tenente de alcaldesa, María Rozas, foron as encargadas de presentar o evento.

Así, a xornada central será o domingo día 26, que arrincará co desfile ‘Alá van estudantes e artesáns’, baixo a coordinación artística de Os Quinquilláns, que sairá da Praza do Toural e percorrerá as rúas de Santiago ata chegar á praza de Conxo. A continuación, a comitiva dirixirase á carballeira de Conxo, na que se fará unha representación teatral do Banquete para dar paso ao tradicional ‘Serán da Fraternidade’ con comida e romaría popular.

“Será unha festa que poña en valor os valores do Banquete de Conxo, o que pedía o estudantado, as persoas que traballan nunha festa de fraternidade, liberdade e igualdade”, manifestou a alcaldesa, que animou a todos os veciños a acompañar o desfile e a levar comida para compartir nesta romaría, na que tamén haberá pulpeira.

Ademais, destacou a implicación da parroquia de Marrozos por primeira vez nesta festividade, que se materializará na lectura do pregón por parte de María Luisa Otero, na participación da Asociación Pena Maior nun taller de baile tradicional e nos percorridos do Tren do Banquete.

O venres, a partir das 17.30 horas, terá lugar ‘As voces do Bosque’, un percorrido literario pola histórica carballeira de Conxo guiado polo editor e escritor Quique Alvarellos, onde se lembrará ás autoras e autores que escribiron sobre o bosque ou no bosque, desde o século XII ata o XX. Para esta actividade é necesario inscribirse en rutabanquete@santiagodecompostela.gal. A partir das 18,30 horas, a praza de Conxo acollerá un taller de baile tradicional impartido pola Asociación Cultural Pena Maior de Marrozos.

Xa o sábado, ás 11.00 horas, terá lugar a Carreira de Orientación da Festa do Banquete, unha proba destinada especialmente á participación de familias. Esta actividade tamén é gratuíta previa inscrición a través de xestanatureza.com.

DÍA GRANDE

O propio domingo 26 de maio, ademais do desfile teatral e o pregón, realizarase a recreación teatral do Banquete de 1856 desde as 14,15 horas. Neste sentido, a alcaldesa animou a todas as persoas asistentes a facer uso dun Photocall que estará instalado no Mosaico de Conxo.

Tras a romaría popular darase paso ao ‘Serán da Fraternidade’ con música tradicional. Tamén haberá oco para o espectáculo de ‘Transhumancia Sonora’ da compañía Paporrubio, que levará ao Banquete os seus animais cabezudos, acompañados de música e xogos.

Para finalizar o evento, sobre as 19,30 horas haberá unha despedida con discursos de Vos Quinquilláns e pregón de peche a cargo da cineasta Jaione Camborda.

MERCADO DO LIBRO

Por outra banda, a quinta edición do Mercado do Libro terá lugar o sábado 25 e o domingo 26 na Praza Aurelio Aguirre. Ademais, o mercado do libro complementarase cunha pequena mostra de oficios tradicionais.

María Rozas tamén mencionou outras actividades que se celebrarán durante a tarde do sábado, como unha mesa redonda sobre libros e saúde mental, poesía ou actuacións musicais de Filloas ou C Mirazo. O domingo haberá tamén unha chocolatada na Praza Aurelio Aguirre e un concerto de Sonoro Maxín que servirá de peche do Mercado do Libro.

CERTAME FOTOGRÁFICO

Así mesmo, entre as múltiples actividades planificadas, a tenente de alcaldesa tamén avanzou que haberá un certame fotográfico no que poderá participar calquera persoa maior de 18 anos. As imaxes gañadoras recibirán diferentes agasallos, como unha cámara de acción deportiva, unha cámara instantánea ou libros de fotografía.

Por todo iso, Goretti Sanmartín convidou a todos os grupos que asistan a esta festividade a que leven a unha persoa que nunca haxa ido para que participe xente doutras parroquias e outros barrios e sexa unha festa “do conxunto de Santiago de Compostela”.

ÚLTIMAS

Sanmartín destaca o diálogo de Xunta e Goberno para o traslado de migrantes e reitera: “Santiago é acolledora”

A alcaldesa de Santiago, Goretti Sanmartín, celebrou o acordo entre a Xunta e o...

Como en anteriores ocasións, Feijóo estará o 25 de xullo na Ofrenda do Apóstolo

O líder do Partido Popular, Alberto Núñez Feijóo, participará o próximo 25 de xullo, Día de...

Nove citas musicais imperdibles no Outono Códax Festival

O Outono Códax Festival quenta motorores para a súa próxima edición, cun cartel que contará con...

O aluguer é o que máis tensiona o mercado da vivenda, segundo un estudo encargado polo Concello

O concelleiro de Urbanismo de Santiago, Iago Lestegás, informou este venres no pleno da...

Nove citas musicais imperdibles no Outono Códax Festival

O Outono Códax Festival quenta motorores para a súa próxima edición, cun cartel que contará con...

O Gran Prix das Carrilanas de Esteiro encherá Compostela de actividade e música este sábado

Este sábado, 20 de xullo de 2024, Esteiro (Muros) celebra a segunda xornada da...

Valentín García destaca o papel do galego no fenómeno Xacobeo durante a entrega do II Premio de Ensaio Camiño de Santiago

O secretario xeral da Lingua, Valentín García, puxo en relevo a importancia de aproveitar...