O Correlingua 2026 dará comezo o vindeiro 5 de maio en Santiago de Compostela, convertendo a cidade no punto de partida dunha nova edición desta actividade de promoción lingüística que percorrerá distintas localidades galegas ao longo do mes. A presentación tivo lugar este martes nunha rolda de prensa na que participaron a alcaldesa Goretti Sanmartín, a secretaria xeral da CIG-Ensino, Laura Arroxo, e o coordinador da iniciativa, Xacobe Rodríguez.
A edición número 26 desenvolverase baixo o lema ‘Co Galego non Corazón, Facemos Revolución’, cunha orientación centrada na sensibilización da poboación máis nova arredor do uso do galego. A carreira compostelá terá como escenario a Alameda, desde onde partirá a actividade.
Durante a presentación, a alcaldesa destacou o valor simbólico e social do uso da lingua, sinalando que “non hai nada que poida ser nestes momentos tan transformador, tan radical, tan revolucionario como decidir usar a nosa lingua”. Tamén incidiu na necesidade de reforzar o seu uso entre a mocidade, ao advertir dunha tendencia á baixa nos tramos de idade máis novos, malia que a cidade presenta “bos datos” en termos xerais.
Neste contexto, Sanmartín cualificou como “moi relevante” a realización de actividades dirixidas á infancia e á xuventude, que definiu como “o futuro da lingua”, e animou á participación na carreira compostelá. Pola súa banda, Laura Arroxo advertiu de que a situación do galego é “crítica” e defendeu a necesidade de que a mocidade tome conciencia activa do seu papel na súa defensa. Segundo indicou, o Correlingua busca “sensibilizar sobre o patrimonio que representa o galego, normalizar a lingua e crear esa identidade tan necesaria como país e como pobo”.
O coordinador do programa, Xacobe Rodríguez, subliñou o alcance da iniciativa, que cualificou como a “maior actividade de normalización lingüística” en Galicia, con arredor de 20.000 participantes. Segundo explicou, ao longo das distintas carreiras previstas realizarase a lectura dun manifesto colectivo elaborado por 320 estudantes de 13 centros educativos, no marco dos obradoiros ‘Desata a lingua’, impartidos por María Lado, Lucía Aldao e Antía Yáñez.
ACTIVIDADES COMPLEMENTARIAS AO LONGO DO ANO
Ademais das carreiras, o Correlingua inclúe outras accións ao longo do curso, como o concurso de lemas, no que participaron máis de 1.800 alumnos de 56 centros galegos. O traballo gañador correspondeu ao alumnado de primeiro curso de FP Básica de panadaría e pastelaría de Vilamarín. Tamén se desenvolve a proposta ‘Regueifando’, orientada á creación colectiva dunha regueifa entre distintos centros educativos.
Tras o inicio en Santiago, o calendario continuará por A Coruña (6 de maio), Moaña (7 de maio), Lalín (8 de maio), A Estrada (12 de maio), Monforte (13 de maio), Narón (19 de maio), Ourense e A Maroña (20 de maio), Pontevedra (21 de maio), Vigo (22 de maio) e Lugo (27 de maio), configurando un percorrido que abrangue boa parte do territorio galego.
