O Ateneo de Santiago acolle este martes, 20, ás 19:00, a proxección da película Arima, dentro do II Ciclo ‘Cinema galego do século XXI’ que organiza o Cineclub Ateneo. A sesión terá lugar en Afundación (rúa do Vilar, 19), e contará coa presentación e comentario da actriz protagonista, Melania Cruz, quen participará nun coloquio aberto ao remate do pase.
Dirixida por Jaione Camborda, Arima propón un relato de atmosfera envolvente no que a vida de catro mulleres e unha nena se ve alterada pola chegada de dous forasteiros a unha localidade indeterminada. O filme sitúase entre o real e o imaxinado, construíndo unha narrativa que transita pola fronteira entre o soño e o pesadelo, cunha posta en escena suxestiva e cargada de simbolismo que explora o medo e o desexo.
A sesión permitirá tamén achegarse á traxectoria profesional de Melania Cruz, unha das intérpretes máis recoñecidas do audiovisual e do teatro galego contemporáneo. Formada na Escola Superior de Arte Dramática de Galicia, a actriz desenvolveu unha intensa carreira escénica e cinematográfica, avalada por múltiples recoñecementos, entre eles os Premios María Casares e os Premios Mestre Mateo.
Tras a proxección, a protagonista compartirá reflexións sobre o proceso creativo de ‘Arima’ e sobre a súa experiencia no filme, nun encontro co público que completa a proposta do Cineclub Ateneo para esta semana dentro do seu ciclo dedicado ao cinema galego do século XXI.
