Unha dobre celebración a dous referentes galegos –Isaac Díaz Pardo e Ramón María do Valle-Inclán– tivo lugar este luns no cemiterio de Boisaca, en Santiago, onde case medio centenar de persoas asistiron para lembrar a vida e obra dos dous homenaxeados, referentes “irrepetibles” para Galicia.
O primeiro acto para honrar a Díaz Pardo –que faleceu o 5 de xaneiro de 2012– comezou sobre as 12.30 horas, o galeguista, escritor e intelectual foi enxalzado coa lectura de poemas e música clásica. Así mesmo, colocáronse coroas de flores e cestos de mazás sobre a súa tumba.
A cerimonia foi presentada por varios relatores que, en diferentes momentos, cualificaron ao artista galego de “irrepetible”, un “navegador de fantasías” ou, simplemente, “un verso libre”.
Nesta liña, a alcaldesa de Santiago, Goretti Sanmartín, puxo en valor a “honestidade” e o “compromiso” que Díaz Pardo mantiña coa cultura, a memoria e con Galicia.
A rexedora tamén destacou o legado do artista a través de proxectos como o Laboratorio de Formas, Sargadelos ou Ediciós do Castro, iniciativas que, segundo subliñou, “foron concibidas para achegar a arte e o pensamento crítico” á sociedade galega.
“(Díaz Pardo) é unha figura clave da cultura galega contemporánea e profundamente vinculada a Compostela”, engadiu a alcaldesa.
UNHA “PEGADA HISTÓRICA”
Pola súa banda, o conselleiro de Cultura, Lingua e Xuventude, José López Campos, que tamén participou na ofrenda floral, subliñou que “sempre hai que ter presente a pegada” que Díaz Pardo e Valle-Inclán deixaron na identidade de Galicia.
“É por iso que, ademais de lembrar datas sinaladas con actos como este, tamén celebramos o legado das nosas figuras históricas con amplas programacións como o Ano Castelao, que terminamos en decembro ou o Ano Oteriano, que iniciamos neste 2026”, destacou o conselleiro.
Con respecto a Valle-Inclán, de cuxo falecemento se cumpren este ano nove décadas, a alcaldesa de Santiago enxalzou a súa “estreita relación” coa capital galega e o valor da súa obra literaria. Tamén subliñou a súa capacidade para “combinar espírito crítico, humor e innovación estética”.
“Compostela foi para o autor un espazo de creación e inspiración, unha cidade que quedou profundamente vinculada á súa traxectoria vital e artística”, salientou.
O dramaturgo, poeta e novelista galego, que formou parte da corrente literaria do modernismo, faleceu o 5 de xaneiro de 1936, meses antes de que se producise o golpe do Estado contra o goberno da Segunda República Española.
