A Galería Luisa Pita inaugurará este venres 14 de novembro ás 20:00 a exposición Óxido, terceira mostra individual do artista Arturo Álvarez (Pontevedra, 1964), na súa sede da rúa Cardenal Payá, 9 en Santiago de Compostela.
A proposta reúne sete esculturas inéditas nas que o creador abre unha nova etapa de investigación arredor do ferro e as mallas metálicas, materiais cos que experimenta distintas vías para frear o proceso de oxidación e poñer en valor a súa carga simbólica. A través deles, Álvarez penetra nos volumes, texturas e efectos tridimensionais que emerxen das superficies, convertendo o desgaste e a corrosión en metáforas da sociedade contemporánea.
En Óxido, o artista aborda o deterioro e a regeneración, concibindo o ferro como un corpo vivo capaz de transformarse e renacer. As pezas suxiren un equilibrio entre natureza e pegada humana, nun diálogo visual onde a simplicidade formal se erixe en principio fundamental. “Menos é máis”, resume o propio autor, que atopa na natureza unha fonte inesgotable de aprendizaxe e inspiración.
Por primeira vez, a luz e a sombra deixan de ser protagonistas no seu traballo: a atención céntrase agora na presenza do material e na súa capacidade expresiva para revelar o paso do tempo. Entre as obras destaca Ego, unha escultura na que a figura humana —única da exposición— serve para reflexionar sobre as máscaras sociais e sobre a “oxidación do ser humano” como proceso de cambio e superación.
Con máis de trinta anos de traxectoria internacional no eido do deseño e da escultura, Arturo Álvarez é recoñecido con premios como o Best of the Year Award de Interior Design (2014) ou o Good Design Award do Chicago Athenaeum. O seu traballo figura en museos, galerías e feiras de arte contemporánea de referencia, consolidando unha presenza sólida no panorama artístico actual.
