A Catedral de Santiago celebrará o Día de Santa Cecilia, patroa da música, con un amplo programa cultural e litúrxico o vindeiro 22 de novembro, coincidindo co Día Internacional da Música, proclamado pola UNESCO en 1975.
A primeira das actividades é a exposición temporal ‘La música en la Catedral de Santiago’, aberta desde esta semana na Biblioteca Capitular e visitable con calquera das modalidades do Museo da Catedral. A mostra reúne algunhas das peças máis valiosas do arquivo musical catedralicio, entre elas a primeira polifonía europea do Códice Calixtino, un cantoral de canto llano, outro de polifonía con obras de Palestrina, manuscritos de mestres de capela como Vaquedano, Melchor López e Santiago Tafall, ou o libro de órgano de Joaquín Sánchez.
Tamén se exhiben composicións máis recentes, como o ‘Himno al Apóstol Santiago’ de Manuel Soler Palmer (1920), a ‘Misa al Apóstol’ de Marco Frisina (2021-2022) e unha obra litúrxica de Fernando Buide (2025). No mesmo espazo poderá contemplarse ademais unha réplica do organistrum, o emblemático instrumento esculpido na arquivolta central do Pórtico da Gloria.
O propio sábado 22, a programación incluirá visitas guiadas ao órgano e á exposición, con grupos reducidos e inscrición previa no correo deac@catedraldesantiago.es, nos horarios de 10:30, 13:30 e 16:00.
Xa pola tarde, ás 19:30, celebrarase unha misa solemne presidida polo arcebispo de Santiago, monseñor Francisco Prieto, na que intervirá a Escolanía da Catedral e se realizará o rito de admisión dos novos integrantes. Participará tamén un grupo instrumental do Centro Superior de Música de Galicia (CsmG), entidade coa que ese mesmo día a Fundación Catedral asinará o seu convenio anual de colaboración.
A xornada culminará cun concerto monográfico dedicado a Giovanni Pierluigi da Palestrina, no V centenario do seu nacemento (1525-2025), interpretado polo grupo Vox Stellae. O acceso será libre ata completar aforo.
