O ata o de agora director do Museo do Pobo Galego, Lois Ladra, presentou a súa dimisión por “imposibilidade de implementar o programa de actuación” co que se comprometera ao asumir o cargo en outubro de 2024. Así o confirmaron fontes da institución, logo de que o xornal Nós Diario adiantase este xoves a súa renuncia.
A presidenta do Patronato do Museo do Pobo Galego, Concepción Losada, explicou que, tras a solicitude de dimisión, ambas partes decidiron “de común acordo” a súa saída “sen máis incidencias”. Losada indicou tamén que todos os membros do patronato foron informados da situación.
Dado que a Asemblea Ordinaria de socios está prevista para o mes de decembro, o Consello de Goberno do museo asumirá temporalmente as funcións da dirección ata a celebración da reunión, que se prevé para o sábado 20 de decembro.
