O Museo do Pobo Galego inicia o mes de novembro cunha programación diversa que combina exposicións, encontros profesionais, faladoiros e presentacións de libros. A actividade arrinca o venres 14, coa inauguración da exposición do Proxecto Didáctico Antonio Fraguas Fraguas, que poderá visitarse no Claustro Alto ata o 13 de decembro. A mostra reúne os proxectos premiados na XIII edición dos galardóns do mesmo nome, impulsados pola fundación Antonio Fraguas e pola Secretaría Xeral de Política Lingüística, e desenvolvidos por centros educativos como o CEIP Lamas de Abade ou o IES Monte Castelo de Burela, entre outros.
Ese mesmo día comezará o Coloquio Galego de Museos Locais, que se prolongará ata o sábado 15 no auditorio do museo. O encontro, organizado no marco do 20º aniversario do Instituto de Estudos das Identidades (IEI), desenvolverase arredor do lema “O futuro dos museos en comunidades en constante cambio”, inspirado na proposta do ICOM para o Día Internacional dos Museos. Participarán unha ducia de institucións museísticas galegas para analizar o papel dos museos ante os retos tecnolóxicos, sociais e ambientais actuais. A entrada será libre ata completar capacidade.
No eido literario, o museo acollerá dúas presentacións. O martes 18, a escritora Paz Leirós presentará o libro E ti, por que queres falar diso, editado polo Consorcio de Santiago e publicado por Alvarellos Editora, coa presenza da alcaldesa Goretti Sanmartín, o xerente do Consorcio José Antonio Domínguez Varela e a presidenta do Padroado do Museo, Concepción Losada. O martes 25, será a quenda de Suso de Toro, que presentará Terra de sacrificio, unha novela na que o autor compostelán revisa a historia recente de Galicia a través dun diálogo imaxinario entre Castelao e Ramón Piñeiro.
O ciclo Faladoiros en Bonaval continuará o xoves 27 cunha intervención da arqueóloga e historiadora Ana Isabel Filgueiras Rei, titulada Antigos cerimoniais e procesións florais. A Gran Troménie de Locronan (Troveni Lokorn). Unha Irmandade Galaico-Bretona. A investigadora abordará as procesións e ritos florais como manifestacións culturais compartidas entre Galicia e Bretaña.
Entre as exposicións temporais, continúa ata o 2 de novembro a mostra das fotografías finalistas do XIX Premio Luís Ksado, organizada pola Deputación da Coruña e comisariada por Xurxo Lobato. A serie gañadora, I gotta change, de Juan Manuel de la Quintana, aborda a saúde mental desde unha mirada artística e documental. Ata o 28 de decembro, poderá visitarse tamén a intervención Espazos contra o baleiro, unha homenaxe ao artista e intelectual Isaac Díaz Pardo, que afonda na súa relación co Museo e coa memoria cultural galega, comisariada por Xosé Ramón Fandiño, María Xosé Fernández Cerviño e Pilar Sampedro.
Ademais, o Museo vén de recibir o Premio Pedra do Destino da Asociación Amigos dos Museos de Galicia, un recoñecemento ao seu labor de conservación e difusión do patrimonio popular galego. O galardón, un cartel de cego pintado a comezos do século XX, pasará a formar parte dos fondos permanentes da institución.
Na súa vertente dixital, o Museo ofrece xa en aberto na súa canle de YouTube a versión restaurada de O carro e o home (1980), montaxe realizada por Xaquín Lorenzo ‘Xocas’ e Eloy Lozano sobre o documental orixinal de 1940. Tamén está dispoñible na web a Guía de pictogramas da Sala do Mar, un proxecto de inclusión e accesibilidade elaborado en colaboración con ASPANAES, Down Compostela, Sarela e o divulgador Xosé Valtierra, co apoio das principais institucións galegas.
