A profesora da Universidade de Santiago de Compostela (USC) e directora do Instituto de Investigación Sanitaria de Santiago (IDIS), Luz Couce, recolleu este venres o XXIII Premio Nóvoa Santos, que concede a Asociación de Médicos Galegos (Asomega). Nun acto en Fonseca, a ‘laudatio‘ correu a cargo do catedrático de Medicina Legal da USC e director da Fundación Pública Galega de Medicina Xenómica, Ángel Carracedo, gañador do Premio Nóvoa Santos en 2009.
O xurado puxo en valor que a profesora do Departamento de Ciencias Forenses, Anatomía Patolóxica, Xinecoloxía e Obstetricia e Pediatría da USC “constitúe o máximo expoñente da neonatología galega, cunha gran proxección tanto no campo estatal como internacional”. “Ademais da súa excepcional traxectoria docente e investigadora avalada por máis de 300 publicacións, 33 proxectos competitivos como investigadora principal e sete rexistros de propiedade intelectual, consideramos particularmente meritorio o seu compromiso coa sociedade e o seu liderado na xestión da investigación en Galicia”, remarca o xurado.
Desde a pasada edición do Nóvoa Santos, a persoa gañadora recibe a metade dos 12.000 euros do premio e ten que elixir a que proposta dun mozo destina outro 25 % da contía e a que proxecto solidario o resto. Nesta ocasión, a doutora Couce elixiu a Rosaura Picáns, investigadora que desenvolve un proxecto de estudo e caracterización de vesículas extracelulares no leite materno, así como á Fundación Andrea polo seu apoio a nenos con enfermidades crónicas.
No acto participou o presidente da Xunta, Alfonso Rueda, quen recoñeceu o labor dos galardoados e do persoal de saúde en favor da sociedade galega. Defende unha boa situación da sanidade galega e mostrou a súa aposta pola investigación. Tamén acudiu o presidente do Parlamento galego, Miguel Santalices, quen apunta a que “reducir a dependencia externa pasa en gran medida pola investigación como a que desenvolve o IDIS”.
