A Asociación de Amigos da Ópera de Santiago continúa o seu labor de posta en valor do patrimonio lírico galego coa recuperación de ‘Non chores, Sabeliña’, zarzuela do compositor Gustavo Freire con libreto de Xosé Trapero Pardo, considerada a primeira escrita en galego tras a Guerra Civil. A obra será representada o sábado 18 de outubro no Auditorio de Vilagarcía e o domingo 19 no Auditorio de Galicia, ambas ás 20:00.
O proxecto conta coa Banda Municipal de Música de Santiago e o Coro do Liceo de Vilagarcía, nunha produción conxunta que suma esforzos para difundir o repertorio escénico-musical galego. A dirección musical e transcrición corre a cargo de Casiano Mouriño, a escénica de José Álvarez e a coral de Josefa Dorado, quen tamén actuará como mezzosoprano. Completan o elenco a soprano Emilia Pérez, o barítono Lucas López e o tenor Víctor Bóveda, entre outros artistas.
O investigador Javier Jurado foi o responsable do estudo e recuperación da partitura, que permite hoxe devolver aos escenarios unha obra esquecida durante décadas. Con humor e retranca, ‘Non chores, Sabeliña’ relata unha historia de amores e desenganos na Galicia rural, chea de lirismo, tenrura e espírito popular.
Tras o éxito das producións anteriores —‘A lenda de Montelongo’ e ‘Miñatos de vran’—, a Asociación de Amigos da Ópera consolida así a súa traxectoria como referente na recuperación da zarzuela galega, un xénero que, grazas a este proxecto, volve ocupar o lugar que lle corresponde na historia musical do país.
