A Fundación Araguaney-Puente de Culturas e o Festival AMAL celebrarán o mércores 9 de outubro na Sala Capitol de Santiago de Compostela, ás 20:30, a segunda edición do ‘AMAL X GAZA. Concerto solidario (Artistas galegas x Palestina)’. O acto enmárcase na programación da XXIII Semana de Cine Euroárabe AMAL e conta co apoio da Cátedra USC–Araguaney para o Diálogo entre Culturas e da SGAE.
O obxectivo principal do concerto é recaudar fondos para a Axencia das Nacións Unidas para os Refuxiados e Refuxiadas de Palestina en Oriente Próximo (UNRWA). Desde a Fundación Araguaney lembran que, malia que varios países —entre eles a Unión Europea e o Estado español— retomaron en 2024 parte do financiamento suspendido, a axencia continúa nunha situación crítica que compromete a distribución de alimentos, medicamentos e servizos básicos de educación e sanidade para millóns de persoas.
O cartel reúne artistas galegos de primeiro nivel que participan de forma altruísta: Mondra, Wöyza, Ruxe Ruxe e Monoulious DOP, aos que se suma a actuación do grupo de danza palestino Watani, con sede en Madrid.
As entradas teñen un prezo anticipado de 15 euros máis gastos de xestión e poden adquirirse a través da páxina web da Sala Capitol, na Reixa Tenda (rúa do Hórreo, 46) e o propio día do concerto no despacho de billetes da sala desde as 19:30. A apertura de portas será ás 19:45 e o acceso está restrinxido a maiores de 16 anos.
