O Ateneo de Santiago fixo público este xoves ás 12:00 a súa memoria de actividades da tempada 2024-2025, nun acto celebrado no local social da entidade. O documento recolle un total de máis de 200 actividades realizadas ao longo do curso, co obxectivo de dar conta do traballo desenvolvido e reforzar a transparencia.
A programación destacou pola súa diversidade temática. Nos Luns do Ateneo abordáronse cuestións de literatura, historia, pensamento contemporáneo e divulgación científica. Tamén tiveron lugar encontros arredor da actualidade social e política, a IV Mostra Internacional de Cine e Educación (CINEDUCA), presentacións de libros, mesas redondas e exposicións.
No apartado musical, o Festival Ateneo Barroco avanzou cara á súa séptima edición, con colaboracións de intérpretes galegos e internacionais. Ademais, a entidade mantivo en marcha a plataforma Radio Ateneo Podcast, os encontros do Seminario Europa, o Club de Lectura, as clases de meditación, roteiros e visitas culturais. O Cineclub Ateneo programou dous ciclos, un centrado no cinema galego e outro no francés, e celebrouse o Premio de Xornalismo Cívico Alfredo Vicenti.
Segundo destacou a entidade, todas estas propostas gozaron dunha boa acollida por parte do público, tanto socios como asistentes ocasionais. O balance presentado reafirma o papel do Ateneo de Santiago, declarado de utilidade pública desde 2012, como espazo de encontro, debate cultural e cidadán na cidade.
