As Escolas de Ensino Galego ‘A Semente’ comezan o novo curso escolar o 8 de setembro con 120 crianzas matriculadas nos diferentes centros que a entidade ten na Coruña, Compostela, Lugo, Trasancos e Vigo. O proxecto, nacido hai catorce anos en Santiago como iniciativa comunitaria para ofrecer un ensino inmersivo en galego desde a primeira infancia, continúa a medrar e consolidarse.
A apertura do curso foi precedida dunha semana de preparación iniciada o 1 de setembro, con actualización pedagóxica das educadoras e traballos de mellora nas instalacións, co obxectivo de garantir un servizo educativo de calidade e un espazo acolledor para o alumnado.
Entre as novidades do período académico 2025-2026 destaca unha aposta pola renovación pedagóxica, resultado dun proceso de formación intensiva das educadoras e de reflexión da comisión pedagóxica nacional. Outro dos eixes será o multilingüismo aditivo, que promove a aprendizaxe doutras linguas mantendo a centralidade do galego como lingua vehicular e reforzando tanto a competencia comunicativa como a autoestima cultural das crianzas. Neste marco, publicouse recentemente unha Guía Sociolingüística para Familias, destinada a ofrecer recursos prácticos para o uso e prestixio da lingua galega no ámbito doméstico.
O proxecto incrementa tamén a súa dimensión comunitaria cunha ampliación das actividades extraescolares, entre as que se inclúen danza tradicional, pandeireta, gaita, tamboril, regueifa, fútbol gaélico e teatro. Ademais, o programa Ultreia intensificará a organización de acampamentos educativos para crianzas e adolescentes, combinando lecer, deporte e identidade cultural.
No ámbito social, ‘A Semente’ reforza o seu programa de bolsas para familias con menos recursos, co fin de garantir a equidade e que ningunha crianza quede fóra por motivos económicos.
Con máis de medio milleiro de persoas socias e unha rede activa de familias e educadoras, ‘A Semente’ preséntase como un modelo educativo alternativo e comunitario, que busca contribuír á transmisión da lingua e da cultura galegas ao tempo que aposta por unha educación renovadora. O inicio deste curso confirma a súa vontade de ser, ademais dunha rede escolar, un proxecto social e cultural de futuro.
