Máis de medio centenar de artistas e 14 compañías galegas, nacionais e internacionais participarán este sábado, día 6, no festival de lecer familiar ‘Cidade Imaxinaria’. A cita terá lugar na Cidade da Cultura, en Santiago de Compostela, desde as 17.00 ata as 22.00 horas, con entrada gratuíta.
Segundo traslada o Executivo galego, un caracol xigante, músicos extraterrestres, seres que se iluminan no atardecer ou unha furgoneta convertida en pista de acrobacias son algunhas das propostas que aterrarán no Gaiás nesta xornada.
Unha actividade, engade, “feita para que maiores e pequenos gocen de propostas culturais atractivas que tamén fomentan a reflexión en torno ao coidado da natureza ou a importancia da colectividade”.
