O Museo do Pobo Galego presentou a súa programación para o mes de setembro, cun calendario que combina propostas musicais, visitas guiadas, faladoiros e encontros profesionais. As actividades están ligadas tanto á exposición Cantareiras. Oralidade. Creación. Transmisión como a outras iniciativas culturais e divulgativas.
O primeiro dos actos terá lugar o sábado 6 ás 16:30 en Palas de Rei, onde o Museo recibirá o premio Son d’Aldea, recoñecemento que se suma á distinción da ‘Pedra do Destino’ acadada este mesmo ano.
O sábado 13 ás 12:30, no xardín do claustro do Museo, ofrecerase un concerto das pandeireteiras ‘Raigañas’, grupo nacido en Cerqueda (Malpica) en 1979 para preservar a tradición musical bergantiñá. A entrada será libre ata completar capacidade.
O xoves 18 ás 19:00, o Museo organizará a derradeira visita comentada á exposición Cantareiras. As técnicas do centro Isabel Vigo e Carme Campo guiarán o percorrido, centrado no papel das mulleres na transmisión da oralidade. A actividade é gratuíta con inscrición previa no correo do Museo.
Unha semana despois, o xoves 25 ás 19:00, terá lugar un faladoiro de Iria-Friné Vázquez Rivera sobre a obra Un ollo de vidro de Castelao, no marco do ciclo Faladoiros en Bonaval. A investigadora analizará a relación do autor co xénero fantástico e terrorífico en Galicia.
O programa do mes rematará o sábado 27 ás 20:00 co espectáculo 586 cantos, impulsado pola MICE como inicio da súa 19ª edición. A proposta, baseada no Cancioneiro Popular Galego de Dorothé Schubarth e Antón Santamarina, servirá para clausurar a mostra Cantareiras.
Ademais destas actividades abertas ao público, o Museo acollerá dúas citas profesionais: o Encontro da Federación Galeusca 2025 o sábado 20, centrado en literatura oral e intelixencia artificial, e o IV Encontro Olga Gallego de Arquivos o sábado 27 pola mañá, cunha xornada dedicada a reflexionar sobre o impacto dos desastres no patrimonio documental.
