O mes de agosto volverá encherse de vida e cultura na zona vella de Santiago de Compostela coa celebración da 22ª edición do festival ‘Feito a Man’, un ciclo de concertos e accións artísticas organizado pola Asociación Cidade Vella coa colaboración do Concello de Santiago. A programación foi presentada esta semana pola concelleira de Turismo e Festas, Míriam Louzao, quen destacou que se trata dun proxecto “nacido da cidade para a cidade”, que “resignifica espazos singulares a través da música, do teatro, da performance e do cabaré”.
O festival desenvolverase ao longo de todo o mes de agosto e contará con máis de 40 propostas musicais e escénicas, nas que participarán artistas e grupos de Galicia, España, Portugal, Brasil e Arxentina, entre outros. A apertura terá lugar coa banda compostelá Sumrrá, que celebra o seu 25 aniversario e que ofrecerá o concerto inaugural na praza da Quintana, espazo que acollerá tamén algunhas das citas máis destacadas do festival.
A programación mestura artistas consolidados e novas voces, con especial presenza do talento local e dunha ampla variedade de xéneros musicais: jazz, rock, blues, flamenco, folk, música de autor, música brasileira e propostas escénicas como a improvisación teatral, que se incorpora por primeira vez ao festival. Entre os nomes salientables están Amoeba Split, Anari García, Raimann Blues con Julián Maeso, Luciana Jury, Sara Rubia & The Bandits, Ton Risco, La Cantona, Bato Xai ou Santi Araujo, entre moitos outros.
Tamén se programaron sesións vermú, actuacións off e un acto de clausura especial na praza de San Martiño Pinario o 22 de agosto, cun cartel que inclúe ao trío Agora Tá con Sergio Tannus, a argentina Luciana Jury e o grupo Sara Rubia & The Bandits, que ofrecerá unha proposta de rock psicodélico con músicos da zona sur de Galicia como Indy Tumbita.
A directora do festival, Ánxeles Porto, salientou o carácter “modesto pero revolucionario” do formato, nado en 2004 como unha maneira de “botar por fóra” a actividade cultural que se xesta durante o inverno nos locais composteláns. Porto reivindicou a necesidade de apoio institucional e social para garantir a continuidade dun modelo que non conta con ingresos directos e que depende do respaldo público.
Nesta edición, o festival incorpora tamén colaboracións con ONG e entidades sociais, como Adega, Ecovidrio, Greenpeace, Andaina, a Mesa pola Normalización Lingüística e outras. Está prevista unha exposición fotográfica sobre o voluntariado ambiental de Greenpeace en Galicia, así como unha charla arredor da moratoria do eucalipto.
A imaxe do festival deste ano, ideada por Antón Corsario, pon o foco na defensa da natureza e dos dereitos ecolóxicos, cun lema que reivindica que “o río tamén ten dereitos e tamén canta”, nunha clara referencia á situación ambiental do río Sarela e á necesidade de preservar os espazos naturais na contorna do Camiño de Santiago.
