A Sala Yago, situada na rúa do Vilar de Santiago de Compostela, inicia unha nova etapa tras a súa compra pola Fundación Aisge (Artistas Intérpretes, Sociedad de Gestión de España), que formalizou recentemente a adquisición do inmoble co obxectivo de reabrilo como espazo de creación e difusión cultural.
A operación foi abordada este mércores nun encontro celebrado na Casa do Concello, no que participaron a alcaldesa Goretti Sanmartín, a concelleira de Capital Cultural Míriam Louzao e o concelleiro de Urbanismo Iago Lestegás, xunto co director xeral de Aisge, Abel Martín Villarejo, e a delegada da entidade en Santiago, a actriz Isabel Blanco.
Durante a xuntanza, abordáronse os plans da fundación para a rehabilitación e posta en marcha da Sala Yago, un espazo que, no pasado, funcionou como cinema e centro cultural, e que leva anos pechado. O Concello valorou positivamente esta operación, que contribuirá a dinamizar o tecido cultural compostelán e a recuperar un edificio emblemático da cidade histórica.
Goretti Sanmartín cualificou a adquisición como “unha moi boa noticia para Santiago e para Galicia”, destacando que suporá “a recuperación dun espazo de dinamismo cultural e dun edificio singular”. A rexedora expresou o apoio do goberno local á nova etapa que se abre para este enclave no corazón do casco vello.
Pola súa banda, tanto o director da fundación como a súa delegada en Compostela mostraron a súa satisfacción pola compra e pola oportunidade que representa para o conxunto do sector artístico galego. Subliñaron o compromiso da entidade con propostas culturais de base escénica e audiovisual, en especial as vinculadas co traballo de actores e actrices.
