A parroquia compostelá de San Xoán de Fecha acollerá nas vindeiras semanas a cuarta edición de O Fechiño. Festival Rupestre e de Proximidade, unha iniciativa impulsada por aCentral Folque en colaboración con diversas asociacións e colectivos culturais da zona. O festival desenvolverase en tres xornadas diferenciadas: o sábado 5 de xullo, o venres 11 e o sábado 12, cunha programación que combina a divulgación do patrimonio rupestre, a música, a creación literaria e o encontro comunitario.
A primeira xornada, o 5 de xullo, comezará ás 18:00 cun serán diverso no Santuario de Belén, conducido por Xavi Castaña e as Pandereteiras da A. X. Regueifa do Val do Dubra. A partir das 21:30, o Colectivo A Rula guiará unha visita nocturna á coñecida Pedra que fala, un dos elementos máis singulares da arte rupestre local, e xa de noite, ás 23:30, Antón Bouzas ofrecerá unha sesión de astronomía cultural, poñendo en relación o ceo coas tradicións e a paisaxe.
O venres 11 de xullo, a actividade trasladarase ao Monte Espiñeira, cunha ruta en bicicleta titulada ‘Os canóns do Tambre’, entre as 17:00 e as 19:00, seguida dunha visita ao conxunto rupestre da zona, tamén da man do Colectivo A Rula, que se desenvolverá entre as 19:00 e as 21:00.
A derradeira xornada, o sábado 12 de xullo, será a máis completa, con programación durante todo o día. Pola mañá, entre as 10:30 e as 14:00, o Clube Espeleolóxico Maúxo conducirá un roteiro rupestre sonoro, mentres que ás 11:00 o músico e divulgador Xurxo Souto ofrecerá a súa actuación O Berro Seco. Xa no Campo da Festa de Lamascal, terá lugar o tradicional xantar popular ás 14:30, seguido da entrega do Fechiño de Honra, que nesta edición recoñece a traxectoria de Aurora de Freira.
A programación da tarde incluirá tamén a proposta poético-musical ‘Todas as formigas percorréndome en mandas’, a cargo de Alba María e Andrea Nunes Brións, e un baile assalto con Montse Rivera, ás 18:30. En paralelo, ás 17:00, arrincará dende San Xoán de Fecha un novo roteiro titulado ‘Tres fortalezas para tres tempos’, guiado polo historiador e divulgador Manuel Gago, que culminará en Fontoade, atravesando Castromaior.
A xornada e o festival pecharanse de novo no Campo da Festa, con dous concertos a partir das 21:00: o grupo Abril e, a continuación, Tres Pesos.
O Fechiño é unha proposta que nace da colaboración entre aCentral Folque e entidades como a asociación ambientalista A Pedra que fala, o Clube Espeleolóxico Maúxo, o Colectivo Cultural A Rula, así como as asociacións veciñais de San Xoán de Fecha, Santa Cristina de Fecha e Montelongo, co apoio da Concellaría de Capital Cultural do Concello de Santiago de Compostela. A iniciativa busca fomentar o coñecemento do territorio, a participación comunitaria e o goce cultural en espazos de especial valor patrimonial.
