O Concello de Santiago presentou este martes unha nova edición do programa ‘Compostela Convive’, unha iniciativa deseñada para promover o diálogo e a convivencia intercultural na cidade. Durante os meses de xuño e xullo, a programación combinará teatro, gastronomía e literatura con actividades abertas á cidadanía e centradas na visibilización das persoas migrantes que residen en Compostela, unhas 12.000 segundo os últimos datos.
A concelleira de Dereitos e Servizos Sociais, María Rozas, destacou na rolda de prensa que o obxectivo do programa é “romper estereotipos e combater os discursos de odio” mediante propostas que permitan coñecer as culturas doutras orixes desde unha perspectiva próxima e creativa. “É unha obriga pública”, sinalou, “ofrecer espazos para dar a coñecer a realidade e as achegas culturais das persoas migrantes, máis alá da súa situación administrativa ou laboral”.
A primeira actividade terá lugar o sábado 21 de xuño ás 20:00 no Teatro Principal, coa representación de Es Sueño Es Vida, da compañía Teatro Sin Papeles. A peza, de carácter autobiográfico, narra a experiencia migratoria do seu protagonista, Thimbo Samb, desde Senegal ata España. A función irá seguida dun coloquio e a entrada será de balde, previa retirada de convites na Zona C e no propio teatro o día da representación.
O programa continuará no mes de xullo con tres xornadas gastronómicas na Aula Gastrocultural do Mercado de Abastos, os días 3, 10 e 17 ás 19:00, con prazas limitadas a 15 persoas e inscrición previa a través do correo compostelaconvive@gmail.com. As sesións estarán conducidas por recoñecidos profesionais: Sara Kim (cociña coreana), Tomás Rubio (gastronomía peruana) e Kike Piñeiro, que colaborará con Moussa Fall e Cissokho Sadio, estudantes de FP en Compostela, para presentar unha proposta de fusión entre a cociña galega e a senegalesa.
A última actividade será o xoves 18 de xullo ás 19:00 na libraría Numax, coa presentación do libro Hermanito, de Ibrahima Balde e Amets Arzallus, que relatan a viaxe de Balde a través do deserto e o mar. Arzallus, quen acompañou a Balde na súa chegada ao País Vasco, estará presente no coloquio, ofrecendo a súa perspectiva sobre este relato oral convertido en obra literaria. A historia foi tamén adaptada recentemente a unha montaxe musical en Londres.
Durante a presentación, Miguel Fernández, presidente da Plataforma polo Emprego, entidade organizadora en colaboración coa UAMI do Concello, puxo en valor a evolución do programa e a súa aposta por “superar a visión reducionista da migración como un problema” para recoñecer a riqueza cultural que achegan as persoas migrantes. Subliñou tamén que estas accións permiten “entender que a súa achega vai moito máis alá do traballo”, destacando exemplos como o de Samb no teatro ou os estudantes senegaleses na cociña.
O programa Compostela Convive reforza así o compromiso do goberno local coa inclusión social e a promoción dunha cidade “acolledora, diversa e libre de prexuízos”, segundo afirmou Rozas. A concelleira tamén lembrou que este venres 20 de xuño, coincidindo co Día Mundial das Persoas Refuxiadas, terá lugar un acto público na Praza do Obradoiro ás 12:30, co apoio da Coordinadora Galega de ONGDs e a lectura dun manifesto.
Compostela Convive complétase cun festival intercultural previsto para o primeiro domingo de setembro na Alameda, consolidando unha programación que busca abrir espazos de encontro, recoñecemento e participación para toda a veciñanza compostelá.
