A Asociación Área Empresarial do Tambre (AAET) inaugurará este luns, 28 de abril, a exposición de pintura titulada Cousa de dous, do artista compostelán Xurxo Ameneiro. O acto terá lugar ás 20:00 horas no Centro Empresarial do Tambre e a mostra estará aberta ao público ata o vindeiro 16 de maio, podendo visitarse de luns a venres en horario de 9:00 a 14:00 horas e de 16:00 a 20:00 horas. A organización recomenda avisar previamente das visitas no teléfono 981 55 28 50.
A exposición reúne un total de 30 obras que recollen os máis de 30 anos de dedicación pictórica de Ameneiro, unha representación do seu pasado, presente e futuro artístico. As pezas que conforman esta mostra teñen diferentes tamaños, desde as pequenas de 20×30 cm, pasando por outras de 70×80 cm, ata algúns lenzos que superan os 100×90 cm. A maior parte das obras foron creadas ao óleo, aínda que tamén se inclúen traballos realizados en pastel sobre materiais como papel de arroz, vexetal, celulosa, tablilla e lenzo.
O propio Ameneiro comenta que as súas pezas reflicten “o meu pasado con ideas convulsas e enfrontadas, o presente con moita luz e positividade, e un futuro contemplativo e relaxado”. O nome da exposición, Cousa de dous, fai referencia ao apoio fundamental da súa esposa Carmela, quen o animou a adentrarse no mundo da pintura, proporcionándolle un rocho e un espazo no seu propio fogar para desenvolver a súa paixón.
Nado en Ames en 1968, Xurxo Ameneiro iniciou a súa carreira artística como pintor autodidacta. A súa traxectoria pasou inicialmente polo mundo da hostalería, onde traballou na Bodeguilla, un espazo que se convertiu nun punto de encontro de artistas galegos, e que influíu na súa creatividade. Posteriormente, a súa inquedanza levouno a adentrarse en profundidade no mundo da pintura, algo que foi fundamental para o seu desenvolvemento artístico. A exposición de Ameneiro no Centro Empresarial do Tambre servirá para ofrecer unha mirada profunda ao seu proceso de creación e ao seu compromiso co arte.
