O proxecto Escóitasme?, unha webserie creada polo alumnado de 4º da ESO do IES Arcebispo Xelmírez I, vén de ser recoñecido como finalista no Premio á Produción de Contido Dixital en Galego da 12.ª edición do festival Carballo Interplay, que se celebra do 24 ao 27 de abril. A proposta, que nace no contexto educativo e está coordinada pola profesora Nuria Quintas, pon o foco na convivencia escolar e na realidade adolescente a través dun formato pensado para os novos hábitos de consumo audiovisual.
A webserie destaca pola súa conexión directa co labor dos chamados Equipos A, grupos de mediación compostos por estudantes que interveñen na resolución de conflitos no centro educativo. Desde esta base, Escóitasme? constrúe unha narrativa en capítulos autoconclusivos de entre 5 e 10 minutos, nos que se exploran situacións cotiás coas que o alumnado se pode identificar: desde o acoso escolar ata a construción da identidade, pasando polo respecto á diversidade ou o uso das redes sociais.
O formato escollido responde á intención de empregar linguaxes próximas á mocidade, combinando drama e estilo multipantalla, co obxectivo de favorecer a normalización da lingua galega en espazos dixitais. Tal e como explica o equipo do proxecto, a serie pretende ser unha ferramenta para xerar reflexión, pero tamén para desenvolver competencias dixitais, lingüísticas e audiovisuais, sempre desde unha perspectiva coeducativa e inclusiva.
Desde o IES Arcebispo Xelmírez I sinalan que esta experiencia parte da filosofía de aprender facendo, integrando a creación, escritura e produción audiovisual como parte do proceso de ensino-aprendizaxe. O alumnado participou activamente en todas as fases do proxecto, o que lles permitiu coñecer de primeira man os retos técnicos e narrativos da produción contemporánea.
Ademais de aspirar a un recoñecemento no festival Carballo Interplay, Escóitasme? busca converterse nun referente para outros centros de ensino que desexen explorar novas formas de traballar a convivencia e a educación emocional desde os medios audiovisuais. O propio título da serie apela á escoita activa como punto de partida para a construción de espazos seguros dentro da contorna escolar: ‘Escóitasme?’. A resposta, din dende o centro, “está tamén nas pantallas”.
