O próximo luns, 17 de febreiro, ás 19:30 horas, o Ateneo de Santiago acollerá unha nova sesión do seu ciclo de conferencias Os Luns do Ateneo, cunha charla dedicada aos avances no tratamento e investigación do alzhéimer. O encontro terá lugar na Rúa do Vilar, 19, e contará coa intervención do doutor José María Prieto, Xefe do Servizo de Neuroloxía do Complexo Hospitalario Universitario de Santiago (CHUS).
A conferencia, titulada ‘Alzhéimer: é hora do cambio?’, centrarase nos progresos acadados na comprensión desta enfermidade neurodexenerativa, que afecta a milleiros de persoas en Galicia e que supón un reto crecente para os sistemas de saúde. O doutor Prieto analizará a evolución dos tratamentos existentes e abordará as perspectivas de futuro en materia de prevención, diagnóstico e abordaxe terapéutica.
A doenza, unha das máis comúns dentro do campo da neuroloxía, impacta tanto nos pacientes como nas sóas familias, converténdose nun problema de gran relevancia social. Por iso, a sesión busca difundir información actualizada e fomentar o debate sobre as estratexias necesarias para mellorar a calidade de vida das persoas afectadas.
O doutor Prieto González é unha das figuras máis recoñecidas no eido da neuroloxía en Galicia. Con formación na Universidade de Santiago de Compostela (USC) e no National Hospital For Neurology and Neurosurgery de Londres, actualmente lidera diversas iniciativas de investigación no Instituto de Investigación Sanitaria de Santiago (IDIS). Ademais, preside a Sociedade Galega de Neuroloxía e o Consello Médico Asesor de Esclerose Múltiple España.
