O Salón Teatro de Santiago acolle desde este xoves e ata o próximo 9 de febreiro o espectáculo ‘Nada se sabe’, unha coprodución do Centro Dramático Galego (CDG) e Culturactiva. A proposta, que ofrecerá unha vintena de funcións, destaca pola súa integración de actores e actrices con diversidade funcional e pola accesibilidade para todos os públicos.
Dirixido por Fran Rei e Ignacio García, ‘Nada se sabe’ aborda a discapacidade desde unha perspectiva única no teatro galego, inspirándose nunha adaptación moderna de ‘Filoctetes’, de Sófocles, asinada por Manuel Lourenzo. A obra combina elementos musicais, linguaxes escénicas e un enfoque inclusivo, co obxectivo de cuestionar a percepción social sobre a diversidade funcional.
O elenco está formado por Corina Alfonso Mañá, Rubén Bargiela Sierpes, Alba Chao García e Elvis García Torres, quen, xunto a un equipo técnico e artístico de renome, dan vida a unha peza que, segundo o director do CDG, Fran Núñez, “propón unha reflexión necesaria para o teatro contemporáneo”.
ACCESIBILIDADE E ACTIVIDADES COMPLEMENTARIAS
As funcións, que se celebrarán de mércores a domingo ás 18:00 horas, contarán con sistemas de accesibilidade, a través de Lingua de Signos, audiodescrición para persoas con discapacidade visual, programas de lectura fácil e visitas táctiles durante as funcións da fin de semana.
Ademais, os espectadores poderán participar en coloquios co equipo ao finalizar as representacións dos venres.
Como parte da campaña ‘Sobes ao autobús do teatro?’, organizaranse autobuses gratuítos desde máis de 40 concellos galegos para facilitar o desprazamento á capital.
As entradas poden adquirirse en liña a través da web ‘entradas.ataquilla.com’ ou no despacho de billetes do Salón Teatro, aberto desde dúas horas antes de cada función.
‘Nada se sabe‘ forma parte das iniciativas impulsadas polo CDG no marco do seu 40º aniversario e da aplicación da Lei de cultura inclusiva e accesible de Galicia. A súa estrea oficial tivo lugar en xullo de 2024 na Mostra Internacional de Teatro de Ribadavia, consolidándose como unha das apostas máis significativas da programación teatral galega.
