O Salón Teatro, sede do Centro Dramático Galego (CDG) en Santiago, abrirá a súa programación de 2025 este venres ás 20.00 horas coa función ‘Frágua de amor’, do dramaturgo portugués Gil Vicente, coproducida pola compañía pública galega xunto a seis entidades culturais lusas: Escola da Noite-Grupo de Teatro de Coimbra, O Bando de Surunyo, Artway, Cendrev-Teatro García de Resende, Teatro Académico de Gil Vicente e Teatro Nacional São João.
A peza está dirixida por António Augusto Barros e conta coa música en directo de O Bando de Surunyo, especializado na interpretación de obras dos séculos XVI e XVII, con seis voces, laúde, viola de gamba, frauta e percusión, coa dirección musical de Hugo Sanches e co galego Xurxo Varela á viola. O elenco de actores e actrices estará formado por Ana Teresa Santos, Carlos Meireles, Igor Lebreaud, Maria Quintelas, Miguel Magalhães, Nuno Meireles, Sérgio Ramos e a galega Mónica Camaño.
Este texto, escrito en 1524 para celebrar a voda de Joâo III con Catalina de Habsburgo, presenta un ambiente festivo pero tamén lanza miradas críticas a cuestións como a Igrexa, a xustiza corrupta ou a fidalguía improductiva que aspiraba a manter os seus privilexios. Tras a súa estrea en Coimbra e o seu paso por Évora en novembro, ‘Frágua de amor’ chega agora a Galicia, antes de recalar no Teatro Nacional Sâo Joâo do Porto, onde se representará do 15 ao 18 de xaneiro. Para a representación no Salón Teatro do CDG poden comprarse xa as entradas na web de Ataquilla, ou o mesmo venres a partir das 18.00 horas no portelo 34 da Rúa Nova de Santiago.
O Instituto Camôes de Vigo ofrece un servizo gratuíto de bus, previa inscrición, desde a cidade olívica con saída ás 17.00 horas desde O Berbés ata Santiago, con regreso incluído e paradas na Escola Oficial de Idiomas de Pontevedra e a de Vilagarcía de Arousa. Este evento é resultado da colaboración, un ano máis, entre a unidade teatral da Xunta e a iniciativa Quintas do Camôes, co fin de pór o foco nas raíces comúns dos idiomas galego e portugués, e de estreitar lazos culturais entre ambos os países.
