A Corporación municipal de Ames celebrou o pleno ordinario de xullo con varios puntos destacados na orde do día, entre os que figuraba a aprobación dun recoñecemento extraxudicial de crédito por un importe de 279.967,02 euros, destinado a pagar gastos municipais do exercicio anterior. O punto foi aprobado por maioría simple, cos votos favorables do goberno local, o PP e o BNG, e coa abstención de Espazo Común.
Durante o debate, a concelleira de Servizos Económicos, Susana Señorís, explicou que se trataba de facturas pendentes de servizos e obras sen cobertura contractual no ano 2024, pero necesarios para o funcionamento municipal. Tanto desde Espazo Común como desde o BNG cuestionouse a falta de planificación e a reiteración do uso desta fórmula orzamentaria, alertando sobre o uso abusivo de contratos menores en áreas como os comedores escolares.
Outro punto aprobado por unanimidade foi a fixación dos festivos locais para 2026, que serán o luns 6 de abril (Luns de Pascua) e o xoves 14 de maio (Ascensión). Tamén sen votos en contra se autorizou a compatibilidade dunha funcionaria para exercer unha actividade profesional privada.
Un dos acordos máis relevantes foi a tramitación do expediente para prohibir contratar durante tres anos coa empresa ‘Osventos innovación en servizos S.L.’, antiga adxudicataria do Servizo de Axuda no Fogar (SAF). Esta medida chega despois da resolución do contrato en abril por incumprimentos graves, incluíndo a perda dunha garantía de máis de 132.000 euros.
Durante este punto, realizouse unha lembranza a Teresa de Jesús Rodríguez González, traballadora do SAF no Porriño asasinada mentres prestaba o seu servizo. A concelleira de Servizos Sociais, Uxía García, insistiu na necesidade de mellorar a prevención de riscos laborais para as traballadoras do sector, mentres que outras intervencións lembraron a traxectoria de Ames en materia de protección laboral.
No apartado de investimentos, o pleno aprobou por maioría a participación na segunda fase do POS+Adicional 2/2025 da Deputación da Coruña, cun importe de 107.713,78 euros. Con estes fondos financiaranse dúas actuacións: a pavimentación de viario en Coira (67.317,07 €) e a instalación dun sistema de rega automática no centro de lanzamento de Ventín (40.396,71 €). O concelleiro Gustavo Nieto explicou que esta segunda fase permite incluír proxectos non previstos inicialmente.
Por último, aprobouse por maioría unha moción do BNG para retirar a simboloxía franquista do concello, en cumprimento da Lei de Memoria Democrática. A proposta recibiu o apoio do grupo de goberno, do BNG e de Espazo Común, mentres que o Partido Popular votou en contra. A moción denuncia a existencia de elementos que vulneran a normativa estatal vixente, como placas, fontes ou cruceiros vinculados á ditadura.
A sesión, que comezou coa lectura dos decretos da Alcaldía desde o último pleno, pode consultarse íntegra na canle de YouTube do Concello de Ames.
