O dúo galego Caamaño&Ameixeiras presenta, xunto ao artista asturiano Rodrigo Cuevas, o tema ‘Catro cousas’, un pasodobre reinterpretado que combina ironía, empoderamento feminino e música de raíz. A canción destaca pola súa gravación en directo e un coidado videoclip rodado no Parque do Pasatempo de Betanzos, considerado un dos xardíns máis singulares de Europa.
‘Catro cousas’ revisa o linguaxe militar e taurino característico do pasodobre, apropiándose del para crear unha peza que é, á vez, unha canción de amor diferente. “É unha canción de amor cara a dentro, de empoderamento feminino e de autocoidado. De querernos a nós primeiro. De saber dicir ‘catro cousas’ cando fai falta”, explican Caamaño&Ameixeiras.
O tema bebe das fontes da música tradicional, inspirado no legado do cego dos Vilares, Florencio, quen á súa vez o aprendera da cantante La Pastorina a través da radio.
A canción está acompañada dun videoclip gravado no Parque do Pasatempo de Betanzos, dirixido por Jorge Rojas. O dúo describe este espazo como un lugar “mágico e magnético” que contribúe a dotar de significado visual e emocional á canción. Para Sabela Caamaño, a experiencia de rodar neste escenario foi especialmente emotiva: “Foi especial revisitalo dende outra perspectiva, agora cunha mirada diferente”.
Sobre a colaboración con Rodrigo Cuevas, o dúo destaca a conexión e facilidade para traballar con el: “Xa sabiamos que Rodrigo era un artista talentoso, pero descubrimos tamén a súa calidade humana. Foi moi inspirador e fluído desde o primeiro momento”. Cuevas, coa súa forte personalidade artística, conseguiu levar o tema “a outra dimensión”, sinalan.
A gravación realizouse en directo para captar a naturalidade e espontaneidade da interpretación ao vivo, algo que Caamaño&Ameixeiras consideran esencial para o tema.
ESTREA EN DIRECTO NA SALA CAPITOL
O tema será interpretado por primeira vez en directo nos concertos de Rodrigo Cuevas, programados para os días 19 e 20 de decembro na Sala Capitol de Santiago de Compostela, que xa esgotou as entradas para ambas as datas.
Esta colaboración reafirma a aposta de ambos os proxectos artísticos por renovar a música de raíz con perspectivas actuais e unha conexión emocional coa tradición.
