A Asociación Área Empresarial do Tambre (AAET) inaugura hoxe, luns 25 de novembro, ás 20:00, a exposición de pintura ‘Mis Paisajes’, da artista África Coll, no Centro Empresarial do Tambre. A mostra estará aberta ao público ata o 27 de decembro, de luns a venres, en horario de 9:00 a 14:00 horas e de 16:00 a 20:00 horas, recomendándose realizar unha chamada previa ao teléfono 981 55 28 50 para organizar a visita.
A exposición inclúe unhas 20 obras de diferentes dimensións, realizadas maioritariamente en técnica mixta sobre tea. O traballo de África Coll presenta a paisaxe como un elemento vivo, no que se atopan o pasado e o presente, utilizando materiais naturais como terra ou fragmentos de plantas, recollidos en lugares específicos. Segundo explica a artista, ‘veo el paisaje no solo como un lugar físico, sino como un archivo vivo, una colección de capas donde el tiempo y la memoria coexisten’.
O proceso creativo de Coll baséase na integración destes materiais no soporte pictórico, coa intención de capturar a memoria intrínseca dos espazos naturais e o paso do tempo. A través de técnicas como a cianotipia e o uso de colodión húmido, as súas obras representan unha ‘xeografía do tempo’, unha exploración visual das estruturas sutís que conectan o presente co pasado.
A ARTISTA E A SÚA OBRA
Nacida en Blanes (Girona) en 1966, África Coll reside en Suecia desde 2001, onde mantén o seu estudo nas aforas de Lidköping. A súa carreira artística está marcada pola combinación de técnicas e medios como a pintura, a fotografía, o vídeo e as instalacións, nunha constante busca de experimentación e novos significados. Na súa obra, reflexiona sobre a relación entre o ser humano, a natureza e o tempo, explorando capas de realidade a través de múltiples formatos e materiais.
Coll ten exposto en diversas localizacións de Suecia e noutros países, e recentemente ampliou o seu traballo cara a encargos de arte pública e instalacións ao aire libre.
‘Mis Paisajes’ representa unha oportunidade para o público compostelán de achegarse a unha proposta artística que conecta a natureza e o tempo coa memoria colectiva e persoal. A exposición, organizada pola Área Empresarial do Tambre, enmárcase no compromiso da asociación por promover actividades culturais no tecido empresarial da comarca.
