O Centro Xove de Creación Cultural da Almáciga será hoxe o escenario dunha homenaxe ao movemento Bravú coa proxección do documental ‘BRAVÚ XXX’, dirixido por Xurxo Souto e producido por Nós Televisión. O acto, que comezará ás 19:00 horas, contará cun coloquio posterior no que participarán o propio Xurxo Souto e Manolo Maseda, músicos destacados da historia do Bravú, e representantes de Nós Televisión. A entrada ao evento é gratuíta ata completar o aforo.
‘BRAVÚ XXX’ percorre a historia do Bravú desde a súa orixe nos anos noventa, cando unha xeración de músicos decidiu levar o rock en galego ás aldeas e espazos máis recónditos de Galicia. Co paso do tempo, o Bravú consolidouse como un movemento cultural espontáneo e colectivo, co obxectivo de conectar a música e a lingua galega cunha expresión auténtica e enraizada no propio territorio.
No documental, Xurxo Souto reconstitúe a historia deste fenómeno a través das voces de músicos de diferentes épocas, como Paola Beiro (Garotas da Ribeira), Nuno Pico (Grande Amore), e a cantautora Sés. Estes artistas achegan as súas experiencias e impresións sobre o impacto do Bravú nas súas propias traxectorias e na cultura galega contemporánea. A peza audiovisual culmina cun emotivo reencontro dos fundadores do Bravú na Taberna Caballero de Chantada, o lugar onde en 1994 o movemento tomou forma.
‘BRAVÚ XXX’ destaca tamén pola súa aposta por visibilizar e celebrar a vitalidade do Bravú hoxe en día. Durante o coloquio, o público terá a oportunidade de coñecer en profundidade como foi o proceso de creación deste documental, que foi producido co apoio de diversas institucións galegas e será emitido o próximo 11 de decembro en Nós Televisión, R e Movistar Plus+.
