A Universidade de Santiago de Compostela inaugurou este martes a Cátedra Institucional Castelao, unha iniciativa destinada a fomentar a investigación e difusión da figura de Alfonso Daniel Rodríguez Castelao, autor clave da cultura galega. Esta cátedra, que xorde dun convenio coa Xunta de Galicia e o Parlamento de Galicia, ten como propósito achegar á cidadanía o legado “escrito, cívico e artístico” deste ilustre rianxeiro.
Entre as accións impulsadas pola cátedra están previstos encontros, xornadas, debates e estudos que afondarán na polifacética obra de Castelao, explorando a súa influencia como escritor, pensador e artista. Un dos eventos destacados é a inauguración da exposición Castelao, de Sempre en Galiza ao Consello de Galiza (1934-1944), que poderá visitarse na Facultade de Filoloxía ata o 15 de xaneiro. A mostra conmemora os 80 anos desde a publicación de Sempre en Galiza e a fundación do Consello de Galicia.
O director da Cátedra, Henrique Monteagudo, resaltou que o proxecto vai alén da súa obra literaria para mostrar a Castelao como un “artista polifacético”.
Durante o acto de apertura, o reitor da USC, Antonio López, destacou a relevancia de crear cátedras institucionais para estudar figuras ilustres, como xa se fixera coa Cátedra Rosalía de Castro. Pola súa banda, o secretario xeral de Política Lingüística, Valentín García, considerou esta cátedra “unha oportunidade para impulsar a investigación” sobre a “ampla e diversa produción artística” de Castelao, cuxa obra será especialmente recoñecida en 2025 co 75 aniversario do seu falecemento.
O decano de Filoloxía, Elías Feijó, lembrou tamén que en abril se aprobou a creación da Cátedra Carvalho Calero, dedicada ao primeiro catedrático de Lingüística e Literatura Galega na USC, así como outra sobre Otero Pedrayo, sumando catro cátedras que, segundo Feijó, “son cátedras de futuro e non de pasado”.
