A sexta edición do festival O Son do Camiño celebrarase os próximos días 12, 13 e 14 de xuño no Monte do Gozo de Santiago de Compostela. Así o anunciaron os promotores do festival, as empresas galegas Bring The Noise e Esmerarte Industrias Creativas, que avanzaron que nos próximos días irán anunciando as primeiras novidades.
Desde a súa creación en 2018, O Son Do Camiño vendeu decenas de miles de entradas o mesmo día da súa posta á venda, esgotando abonos en horas. Este festival, apoiado pola Xunta, naceu co obxectivo de pór a Galicia no mapa do turismo musical nacional así como promocionar dous dos principais estandartes da cultura galega: o Camiño de Santiago e o Ano Santo. Os promotores destacan que, ao longo dos anos, O Son Do Camiño erixiuse como un dos motores turísticos máis importantes non só de Santiago de Compostela, senón de toda Galicia.
Neste sentido, sinalan que, con máis dun 41 % do seu público procedente de fóra de Galicia, incluíndo países como Reino Unido, Portugal, Suíza e Italia, na súa edición de 2024, O Son Do Camiño é o evento de pago máis grande do norte de España con preto de 130.000 asistentes anualmente. Así, consolidouse como un dos eventos máis destacados a nivel nacional e, sen dúbida, é un dos festivais de gran formato máis recoñecidos.
