A Real Academia Galega de Ciencias (RAGC) e as facultades de Bioloxía, Ciencias, Física, Matemáticas e Química da USC anuncian a convocatoria do XI Concurso ‘A Ciencia en imaxe’. Este certame, que se celebra con motivo da festividade de San Alberte Magno, patrón das facultades de Ciencias, está dirixido a toda a comunidade universitaria da USC e busca premiar as mellores fotografías divulgativas relacionadas co ámbito científico.
As persoas interesadas en participar deberán enviar as súas fotografías, xunto co formulario de inscrición, ao correo indicado antes do 10 de novembro. As bases do concurso establecen que as imaxes deben ser orixinais e inéditas, sen ter sido publicadas previamente en ningún medio. Admitirase unha única fotografía por participante, que deberá estar en formato jpg e non superar os 5 MB. Non se permiten fotomontaxes, aínda que si pequenas correccións de cor e luminosidade.
O xurado estará composto por representantes das facultades organizadoras e un membro da RAGC, podendo contar tamén coa colaboración dunha persoa experta en imaxe. As fotografías serán valoradas tendo en conta a súa orixinalidade, estética, capacidade de comunicación e adecuación á temática científica. Os gañadores recibirán un primeiro premio de 200 euros e un segundo premio de 100 euros.
Os premios entregaranse o 14 de novembro durante a celebración de San Alberte Magno na Aula Magna da Facultade de Química. O fallo do xurado publicarase no Taboleiro Electrónico da USC e na páxina web da facultade de Química.
Para máis información e consulta das bases, os interesados poden acceder á páxina web da USC.
