O próximo 27 de outubro, ás 18:00, o Concello de Santiago organiza un acto de homenaxe á escritora e activista Begoña Caamaño, co gallo do décimo aniversario do seu falecemento. O evento, titulado ‘Celebrando Begoña Caamaño, 10 anos connosco’, terá lugar no Teatro Principal da capital galega e contará coa participación de figuras destacadas do panorama cultural galego.
A alcaldesa de Santiago, Goretti Sanmartín, xunto coa concelleira de Capital Cultural, Míriam Louzao, e a actriz Tero Rodríguez, presentaron este venres o acto nunha rolda de prensa. Sanmartín destacou a relevancia de Begoña Caamaño para Santiago e Galicia, lembrándoa como unha ‘figura de profundidade’ que deixou unha pegada como escritora, xornalista cultural, feminista e antimilitarista.
O evento incluirá un percorrido pola obra literaria e poética de Caamaño, con pezas como ‘Morgana’, o ‘Alalá das Mariñas’ e o ‘Libro das Amigas’, interpretadas por artistas como Ana Romaní, Andrea Nunes, Guadi Galego, Tero Rodríguez e Uxía. Aparte das intervencións literarias, os asistentes poderán escoitar un tema musical inédito, ‘Morgana’, composto por Uxía e Magín.
A alcaldesa animou á cidadanía a participar no evento, sinalando que ‘queremos que sexa unha festa; sería o que a ela lle gustaría’.
