O conselleiro de Educación, Ciencia, Universidades e FP, Román Rodríguez, participou este luns na inauguración da exposición ‘José Rodríguez. O matemático de Bermés’, organizada pola Real Academia Galega de Ciencias en colaboración coa Xunta e que rende homenaxe a esta figura no bicentenario do seu falecemento. Acompañado polo secretario xeral da Lingua, Valentín García, o titular de Educación puxo en valor o legado deste “ilustre matemático” de Bermés, ao que cualificou de “un dos maiores e máis cativadores xenios” da historia galega.
“Logrou grandes éxitos, como os seus estudos relacionados co meridiano de Greenwich ou os cálculos precisos do arco do meridiano terrestre, e fíxoo sempre reivindicando as súas raíces”, subliñou, ademais asegurou que agora é o “deber” dos galegos homenaxear a súa figura. Segundo detallou a Xunta nunha nota de prensa, a mostra, que será itinerante, poderase visitar na Igrexa da Universidade de Santiago ata o 12 de novembro e despois desprazarase ata Lalín para terminar o seu percorrido en 2025 en Madrid.
Neste sentido, o conselleiro destacou que esta é unha exposición “única” que se desprazará ata os espazos que “fixeron grande” a lenda do Matemático. “Aquí en Santiago, no seu Lalín natal e tamén en Madrid, unha demostración máis da universalidade dentro e fóra das nosas fronteiras”, esgrimiu. Deste xeito, en Santiago poderá visitarse a exposición de luns a sábado desde as 11.00 ata as 14.00 horas e de 17.00 a 20.00, mentres que os domingos o horario estará limitado ao tramo da mañá, desde as 11.00 ata as 14.00 horas.