O catedrático de Ciencia Política da UNED, Xavier Coller, presentou onte no Ateneo de Santiago o seu libro La teatralización de la política en España, onde explora a dicotomía entre a percepción de conflito constante e a realidade de cooperación nas cámaras parlamentarias. Segundo Coller, “a política parlamentaria é, en parte, un escenario no que se amosa un alto grao de consenso, aínda que desde os medios parece que todo está cheo de conflitos e insultos”.
Coller destacou unha das principais conclusións do seu estudo en declaracións a Xornal de Compostela: “Dá a sensación de que a política se converteu nun problema para os cidadáns debido á imaxe de constantes broncas, abucheos e insultos que transmiten os medios”.
Así mesmo, durante a presentación do seu libro no salón de actos de Afundación, sito na rúa do Vilar, matizou que “cando analizamos, vemos que máis do 85% das leis que se aproban nas cámaras parlamentarias fanse cun amplo consenso, a pesar da percepción de conflito constante”. Este desfasamento entre percepción e realidade é o que o autor chama ‘teatralización’, un fenómeno que, segundo el, “provoca a desafección cidadá cara á política”.
Ademais, Coller indicou que o seu traballo tamén revela diferenzas rexionais significativas. Fixo principale fincapé en Galicia: “En Galicia está o índice máis alto de desacordo parlamentario, mentres que comunidades como Catalunya ou Canarias destacan polo seu maior grao de consenso”. Aínda que non quixo aventurarse a dar unha explicación definitiva sobre os motivos deste fenómeno na comunidade galega, sinalou que “depende moito do clima político e da composición das cámaras, así como das maiorías gobernamentais”.
EROSIÓN DA DEMOCRACIA
Unha das principais preocupacións de Coller é o impacto que ten esta teatralización no sistema democrático. “A percepción dos propios parlamentarios que entrevistei é que a teatralización excesiva erosiona a confianza na política. Este comportamento, que inclúe insultos, violencia verbal e ameazas, leva á cidadanía a desprestixiar a profesión de político, o que pode ter consecuencias graves para o funcionamento democrático’. Para o catedrático, a teatralización non só afecta á credibilidade dos partidos e gobernos, senón que tamén ‘contribúe á polarización e á radicalización, erosionando a confianza nas institucións e mesmo na democracia como sistema político”.
