O Goberno local de Santiago respondeu ás críticas formuladas polo Partido Popular sobre o atraso no pagamento das bolsas de comedor escolar, atribuíndo esta situación a problemas técnicos derivados da implantación dunha nova aplicación contable municipal.
Nun comunicado remitido aos medios, o executivo recoñeceu a demora e sinalou que “lamenta o atraso no pago das bolsas de comedor escolar e entende o malestar das ANPAs, principais prexudicadas da demora”. Así mesmo, indicou que o Concello está a traballar para axilizar os pagamentos “na medida do posible” unha vez solucionadas as incidencias detectadas.
Segundo explicou o Goberno municipal, o atraso está relacionado coa posta en marcha dun novo sistema informático de xestión contable e cos problemas rexistrados durante o proceso de migración de datos desde a aplicación anterior. Neste sentido, subliña que “o atraso no pago ten, polo tanto, motivos técnicos e non responde a cuestións políticas”, en resposta ás acusacións realizadas polo grupo popular.
O executivo tamén puxo o foco na evolución do investimento municipal neste ámbito, destacando que actualmente o Concello destina 1,1 millóns de euros ás bolsas de comedor escolar, actividades extraescolares e material, que chegan a preto de 2.000 menores. Fronte a estes datos, lembra que no curso 2013-2014, co Partido Popular no goberno local, o orzamento para bolsas de comedor era de 87.500 euros e beneficiaba a menos de 300 nenos e nenas.
A este respecto, o Goberno defende que estas cifras “avalan a aposta que se está a facer neste mandato por defender o público, pola conciliación e polos dereitos sociais” da cidadanía compostelá.
