O pasado 15 de agosto, varias parroquias compostelás celebraban as festividades pola Asunción da Virxe. Porén, algúns templos rurais da capital galega foron obxecto de tentativas de roubo durante estas datas.
Na igrexa parroquial de Santa María de Marrozos, entre a noite do 15 e o 16 de agosto, os intrusos lograron forzar as portas do templo e levar un limosnario. “Remexérono todo e profanaron o Santísimo“, explicaba o sancristán desta parroquia. Explicou asimesmo que “abriron o sagrario, quitaron o Copón, aínda que non o roubaron, e levaron ou consumiron a sagrada forma”. A Policía Nacional e axentes científicos acudiron ao lugar para recoller pegadas e outras evidencias.
De maneira similar, a igrexa de Santa María de Figueiras, que tamén estivo de celebración, foi atacada. O párroco Miguel López Varela informou que “os estragos que fixeron foron forzar a entrada e intentar subtraer o Sagrario, pero non foron quen de facelo porque quedou atascado”. Neste caso, a porta de madeira foi rota, pero o sagrario non foi levado.
Tamén se produxeron intentos de roubo noutras parroquias. Na igrexa de San Martiño de Laraño, os intrusos intentaron forzar a entrada cunha pedra, pero non lograron acceder ao templo debido á súa porta metálica. As mesmas tentativas fallidas rexistráronse en Roxos e Santa Lucía, onde tamén se intentou forzar a entrada sen éxito.
O Partido Popular de Compostela denunciou que estes incidentes non se limitaron ás igrexas, senón que tamén afectaron a casas nas proximidades. A edil Nerea Barcia criticou a falta de medidas preventivas e a escasa presenza policial no rural, solicitando unha maior protección para o patrimonio cultural da zona.
Dende o goberno local alegan que a Policía Local só ten competencias no ámbito urbano e periurbano, e subliñaron o seu compromiso co rural mediante acordos e investimentos para a rede de saneamento e apoio ao asociacionismo.
